久別紐西蘭，再度一人重遊，但係正式多咗一個新嘅興趣 - 露營。之前紐西蘭生活時最多都係road trip，行行山玩玩水，亦都未有攝影呢個技能，番到嚟香港住之後，特別係經營Nothingblue後成日都有少少可惜後悔嘅感覺 “如果個時我識影相就好” “如果個時我行多d NZ嘅trails同露營就好” 所以今次帶住少少彌補嘅感覺獨遊紐西蘭，希望可以帶多d野番嚟香港。
題外話：紐西蘭係一個好奇幻嘅地方，想講起紐西蘭嘅時候10個有9個人都潛意識會誤講係澳洲，‘啊 澳洲好冇玩啊’ ‘澳洲讀完書番嚟？’ ‘澳洲凍唔凍’等，唔知有無人有同感？
題外話2，帶露營用品或行山鞋入境記住申報，因為要保護紐西蘭土壤等原因，如果唔係會罰錢
講番New Zealand，係一個港人旅遊相對無咁熱門嘅地方，可能遠又相對貴d或者無咁多城市野。New Zealand係一個重視自然及環保嘅國家，禁膠、回收、自然保育、可持續發展等都係佢地至今仍然有不少美麗自然風景嘅原因。
而紐西蘭主要分為北島及南島，南島相對較多自然景觀及山徑，亦係我第二個故鄉，所以我整整十日都係環繞整個南島自駕遊，駕駛咗差不多1600至2000km。
12小時嘅飛行，嚟到Christchurch，下機後馬上拎車就出發駕駛3個多小時去下一個鎮Dunedin，停留數天同親友見個面就出發去主要目的地 - Queenstown。
Queenstown 係一個旅遊重鎮，因為其附近嘅國家公園，大量山徑山脈湖河冰川等，基本上去行山一定會由Queenstown出發，而其中一日我都安排咗登上Ben lomond track經Tiki trail（可乘搭纜車唔行tiki trail)，全程連tiki trail差不多1600m 爬升，return約6小時+tiki trail 1小時， 路徑不算難行，但仍需要一定體力，接近山峰區域亦有積雪滑冰面等位置。但整體風景優美，如果大家喺Queenstown 有多一日空閒時間可以一戰。